Bu gün ad günümdür, doğum günümdür,

Şükür yaradana, neçə ki sağam,

İldə bir günüm var...ikincisini

Dünyadan köçəndə qazanacağam.

Sevincə şərik çıxar,

Qəmi bölər səməni,

Təbiəti dirildər,

Özü ölər səməni.

           Müəllif

Zülmün pəncəsindən qurtulmaq üçün

Ölümü qənimət biləcəyəm mən,

Dünyada ilk insan olacağam ki,

Əcəlin üzünə güləcəyəm mən.

Bəs deyib, yarımdan ayrılaram da,

Anamla görüşə biləcəyəmsə,

Qılınc tək qınımdan sıyrılaram da,

Anamla görüşə biləcəyəmsə.

Bilmirəm qəmlənim, yoxsa sevinim,

Fələk qəzəbini bərk edən gündü,

Bir ellər gözəli ata evini,

Bir ana dünyanı tərk edən gündü.

Dərələr, təpələr büründü çənə,

Ahımı dağlara ötürüb gəldim,

Anamın qəbrinin ziyarətinə

Bir dəstə qızılgül götürüb gəldim.

Yoxluğun qəlbimi dəlib

Göz aşdı xalınca, ana,

Tikanlar üstə gəzirəm,

Ayağı yalınca, ana.

Yanına çağırıb məni bir axşam,

Söylədin: ay oğul dayanma gendə,

Görürsən yamanca naxoşlamışam,

Yanıma dərd bilən bir həkim göndər.